Dowladda Denmark ayaa ku adkaysatay in la ixtiraamo midnimada dhuleed ee Denmark, kaddib markii madaxweynaha Maraykanku u magacaabay guddoomiyaha gobolka Louisiana wakiil gaar ah oo lagu sheegay inuu ka shaqaynayo sidii Greenland loo hoos keeni lahaa gacanta Maraykanka.
Denmark waxay filaysaa in dhammaan dalalka, oo ay ku jirto Maraykanku, ay ixtiraamaan madaxbannaanida dhuleed ee boqortooyada Denmark, ayuu yiri Wasiirka Arrimaha Dibadda Lars Løkke Rasmussen Isniintii.
Rasmussen wuxuu bayaan ku sheegay in inkastoo magacaabistu “xaqiijinayso danaha sii socda ee Maraykanka ee Greenland,” haddana Denmark ay ku adkaysanayso in “qof walba — oo ay ku jirto Maraykanku — uu ixtiraamo midnimada dhuleed ee Boqortooyada Denmark.”
Telefishannada Denmark ee TV2 iyo DR ayaa weriyey in Rasmussen uu markii dambe sheegay inuu wasaaradda u yeeri doono safiirka Maraykanka ee Copenhagen, Kenneth Howery, si kulan loola yeesho.
“Arrintan horay ayaan u sheegnay. Hadda mar kale ayaan ku celinaynaa. Xuduudaha qaran iyo madaxbannaanida dawladaha waxay saldhig u yihiin sharciga caalamiga ah,” ayay ku yiraahdeen bayaan wadajir ah Ra’iisul Wasaaraha Denmark Mette Frederiksen iyo dhiggeeda Greenland Jens-Frederik Nielsen.
“Waa mabaadi’ aasaasi ah. Ma qabsan kartid dal kale. Xitaa adigoo ku doodaya amni caalami ah.”
“Greenland waxay leedahay dadka reer Greenland, Maraykankuna ma la wareegi karo Greenland,” ayay ku dareen bayaanka oo xafiiska Frederiksen email ku diray. “Waxaan filaynaa in la ixtiraamo midnimada dhuleed ee wadajirka ah.”
Nielsen oo ah hoggaamiyaha Greenland ayaa hore Facebook ugu qoray in dhulkan is-maamulka ah ee hoos yimaada Denmark uu “mar kale ku baraarugay ogeysiis cusub oo ka yimid madaxweynaha Maraykanka, balse taasi waxba kama beddelayso xaaladda gudaha.”
“Greenland waxay leedahay dadka reer Greenland, midnimadeeda dhuleedna waa in la ixtiraamaa,” ayuu Nielsen ku qoray, isagoo intaas ku daray in inkastoo dhulku soo dhoweynayo iskaashi lala yeesho dalal kale, haddana taas ay tahay in lagu sameeyo ixtiraam buuxa oo loo hayo dadka Greenland iyo qiyamkooda.
Landry wuxuu ballan qaaday in Greenland laga dhigo qayb ka mid ah Maraykanka
Trump ayaa Axaddii ku dhawaaqay inuu guddoomiyaha Louisiana, Jeff Landry, u magacaabay wakiil gaar ah oo u qaabilsan Greenland, isagoo sheegay in Landry “fahamsan yahay sida ay Greenland muhiim ugu tahay amniga qaranka Maraykanka.”
Landry ayaa bartiisa X ku qoray in “ay sharaf ii tahay inaan kuu adeego jagadan mutadawacnimo ah si Greenland looga dhigo qayb ka mid ah Maraykanka.”
Trump ayaa marar badan ku celceliyay inuu doonayo in Maraykanku yeesho awood sharciyeed oo ka talisa jasiiraddan ballaaran ee hodanka ku ah macdanta, taasoo ku taalla Waqooyiga Badweynta Atlantik, tan iyo xilligii kala guurka madaxtinimadiisa iyo bilihii hore ee xukunkiisa labaad. Wuxuu xitaa meesha ka saarin inuu adeegsado awood militari si uu ula wareego dhulkan istiraatiijiga ah.
Bishii Maarso, Madaxweyne Ku-xigeenka JD Vance ayaa booqday saldhig militari oo Maraykanku ku leeyahay meel fog oo Greenland ah, wuxuuna ku eedeeyay Denmark inay si liidata u maalgelisay horumarinta dhulkaas.
Arrintan ayaa warbaahinta ka yara baxday, balse mar kale soo cusboonaatay kaddib ku dhawaaqistii Axaddii.
Bishii Agoosto, mas’uuliyiinta Denmark ayaa u yeeray safiirka Maraykanka kaddib warbixin sheegaysay in ugu yaraan saddex qof oo xiriir la leh Trump ay ka fuliyeen Greenland hawlgallo qarsoodi ah oo saameyn ku yeelanaya aragtida dadweynaha.
Denmark iyo Maraykanku waa xulafo ka wada tirsan NATO.
Greenland, oo ay ku nool yihiin qiyaastii 57,000 oo qof, waxay qayb ka ahayd Boqortooyada Denmark in ka badan 600 sano, balse waxay heshay is-maamul ballaaran sanadkii 1979. Waxay maamushaa inta badan arrimaha gudaha, halka Denmark ay ka mas’uul tahay difaaca iyo siyaasadda arrimaha dibadda.
