Xogta la faafiyey iyo halka ay ka timidMaalmihii la soo dhaafay, baraha bulshada ayaa lagu faafiyey in daraasad ay sameeyeen cilmi-baarayaal Koonfur Kuuriya ah ay “caddeysay” in tallaalka COVID-19 uu kordhiyo halista ilaa lix nooc oo kansar ah.
Sheegashooyinkan ayaa si weyn u faafay, iyadoo dad leh xirfado caafimaad ama magac xirfadeed ay u adeegsadeen si ay u muujiyaan in ay run yihiin.
Daraasadda la xusay waxaa cinwaankeedu ahaa:
“1-year risks of cancers associated with COVID-19 vaccination: a large population-based cohort study in South Korea”
waxayna lagu daabacay joornaalka cilmiyeed ee Biomarker Research.
Daraasaddu waxay isticmaashay xogta caymiska caafimaadka ee Koonfur Kuuriya, waxayna ogaatay xiriir tirakoob ah oo muujinaya in dadka la tallaalay ay u badnaayeen in lagu ogaado noocyo gaar ah oo kansar ah hal sano gudihiis.
Laakiin xiriir tirakoob ah ma micnaheedu aha in midkood uu sababay kan kale — taas ayaa ahayd meesha ay dad badani khaldeen.
Yaa faafiyay sheegashada beenta ah?
Baraha bulshada sida Vigilant Fox ayaa sheegtay in daraasaddu muujisay “kordhin 27% ah oo guud ahaan ah halista kansarka”, iyo in kansarka sambabada uu kordhay 53%, halka kansarka qanjirka ‘prostate’ uu kordhay 69%.
Sidoo kale, Nicolas Hulscher, oo isagu isku sheegay “epidemiologist”, ayaa si khaldan u sheegay in tallaalku kordhiyo “toddobo nooc oo kansar ah”.
Dhakhaatiir caan ah sida Peter A. McCullough iyo Dr. Aseem Malhotra ayaa iyaguna taageeray sheegashadan, taasoo sii xoojisay warxumada faafisay.
Ururka Children’s Health Defense, oo caan ku ah ololayaasha ka dhanka ah tallaalka, ayaa daabacay warbixin cinwaankeedu ahaa:
“All COVID Vaccines Increase Cancer Risk, New Study Concludes” — taas oo ahayd si buuxda u marin habaabin.
Maxay khaldeen dadka faafiyay xogta?
Hay’adda xaqiijinta runta ee Sanad Verification Agency (oo ka tirsan Al Jazeera) ayaa baaray daraasadda dhabta ah, waxayna ogaatay in dadka faafiyay sheegashadan ay si ula kac ah uga tageen jumlad muhiim ah oo ku jirtay natiijada daraasadda:
“Epidemiological association without causal relationship”
(Xiriir tirakoob ah laakiin aan sababnimo ahayn).
Taasi waxay ka dhigan tahay in daraasaddu kaliya ogaatay xiriir ay tirakoobka muujinayaan balse ma aysan caddeynin tallaalku keeno kansar.
Tusaale ahaan: haddii iibka jalaatada uu bato xagaaga, isla markaana tirada dadka quusay ay korodho, tirakoob ahaan waa xiriir, balse jalaatadu ma keento quusasho — sababta guud waa cimilo kulul oo dadka badaha u geysaysa.
Qaladku wuxuu dhacay markay dadka faafiyay xogta ay xiriirka tirakoobka ah u beddeleen “sabab toos ah”.
Sidoo kale, waxaa jira arrin la yiraahdo “surveillance bias” – dadka la tallaalay badanaa waa kuwa si joogto ah u samaysta baaritaanno caafimaad, sidaas darteed kansar ayaa laga heli karaa goor hore, balse ma ahan in tallaalku sababay.
Maxay dhab ahaantii sheegtay daraasadda Koonfur Kuuriya?
Cilmi-baarayaasha Koonfur Kuuriya waxay si cad u sheegeen in daraasaddu aysan caddeyn sababnimo midna, balse ay soo bandhigtay xiriir tirakoob ah oo u baahan cilmi-baaris dheeraad ah.
Qoraalkooda gabagabada ah wuxuu yiri:
“Daraasaddayadu waxay soo jeedinaysaa xiriir tirakoob ah (epidemiological association) oo u dhexeeya tallaalka COVID-19 iyo kiisaska kansarka, iyadoo kala duwanaansho lagu arkay jinsiga, da’da, iyo nooca tallaalka. Si kastaba ha ahaatee, waxaa loo baahan yahay cilmi-baarisyo dheeraad ah si loo caddeeyo xiriirka sababta iyo cawaaqibta, iyo in la baaro hababka molecular ee suuragalka ah ee la xiriira falcelinta tallaalka.”
Sidaas darteed, sheegashada ah in “tallaalka COVID-19 uu keeno kansar” waa been abuur, waxayna ka dhalatay si ula kac ah oo loo qalloociyay xogta daraasadda.
Daraasaddu ma aysan caddeyn in tallaalka COVID-19 uu sababo kansar.
- Waxay kaliya muujisay xiriir tirakoob ah oo u baahan cilmi-baaris dheeraad ah.
- Dadka faafiyay sheegashada waxay ka tageen qayb muhiim ah oo muujinaysay in xiriirkaas uusan ahayn mid sabab ah.
- Xaqiiqdu waa in la adeegsaday xogta si loogu abuuro cabsi iyo kalsooni-darro ku saabsan tallaalka.
