Soo jeedintan ayaa timid iyadoo Ruushku uu sii kordhinayo weerarrada fog fog ee uu ku hayo Ukraine, mararka qaarna uu habeen kaliya ku duqeeyo diyaarado drone ah tiro ka badan intii uu ku duqeeyay bil dhan sanadkii 2024.
Madaxweynaha Ukraine, Volodymyr Zelenskyy, ayaa Sabtidii sheegay in Kyiv ay soo jeedisay in toddobaadka dambe la qabto wareeg cusub oo wadahadallo nabadeed ah oo lala yeesho Ruushka.
Zelenskyy oo fariin muuqaal ah kusoo dhigay baraha bulshada, gaar ahaan X, ayaa ku baaqay in “xawaaraha wadahadallada la dedejiyo” si loo helo nabad waarta. “Shir heer hoggaan ah ayaa loo baahan yahay,” ayuu yiri, isagoo carabka ku adkeeyay in Ukraine diyaar u tahay arrintaas.
Zelenskyy wuxuu sheegay in Rustem Umerov, xoghayaha cusub ee Amniga Qaranka iyo Difaaca ee Ukraine, uu yahay qofkii rasmiga ahaa ee u diray casuumaadda dowladda Moscow. Umerov ayaa sidoo kale hoggaaminayay wafdigii Ukraine ee wadahadalladii bishii hore ka dhacay magaalada Istanbul.
Wadahadalladii hore ee la qabtay bishii Juun kama dhalan heshiis xabbad-joojin ah, hase yeeshee waxay horseedeen is-dhaafsi maxaabiis dagaal.
Wareeggii ugu horreeyay ee wadahadallada, oo dhacay 16 May, ayaa sidoo kale dhaliyay is-weydaarsi maxaabiis ah — kii ugu ballaarnaa ilaa hadda — balse weli wax natiijo ah kama aysan keenin dhanka joojinta duullaanka buuxa ee Ruushku ku hayo Ukraine.
Zelenskyy wuxuu sidoo kale ku booriyay xulafada Reer Galbeedka in ay sii adkeeyaan cunaqabataynta ka dhanka ah Ruushka.
“Waxa aad muhiim u ah in xirmada cusub ee cunaqabataynta Midowga Yurub ay sidoo kale taageeraan waddamada kale ee Yurub ee xor ah kuwaas oo aan hadda xubno ka ahayn Midowga Yurub,” ayuu yiri.
Wuxuu intaas ku daray: “Waxaan sidoo kale ka shaqeyneynaa dhanka Mareykanka, waxaana jiraan heshiisyo lala galay Madaxweyne Trump oo u baahan in sida ugu dhaqsaha badan loo hirgeliyo.”
Maalin ka hor hadalkii Zelenskyy, Midowga Yurub ayaa cunaqabatayn cusub ku soo rogay Ruushka, taasoo beegsatay saliidda iyo bangiyada. Tani waxay noqonaysaa xirmadii 18-aad ee cunaqabatayn ah tan iyo bishii Febraayo 2022.
Horraantii bishan, Madaxweynaha Mareykanka ayaa sidoo kale ku hanjabay cunaqabatayn kale oo ka sii adag haddii aan heshiis nabadeed laga gaarin dagaalka muddo 50 maalmood gudahood ah.
Madaxweyne Trump oo fariin kusoo qoray bartiisa Truth Social, ayaa ku tilmaamay hanjadda mid jawaab u ah sida Ruushku “si daran u garaacayo Ukraine dagaalka.”
“Ruush iyo Ukraine, fadlan miiska wada xaajoodka ku kulma hadda, ka hor inta aanay goor dambe noqon. Waad mahadsan tihiin,” ayuu Trump ku soo gunaanaday.
